佐山野花平凡而不凡嘅工作室生活

Nohana Sayama in studio. Photograph: © Chihiro Shigemitsu

簡單嚟講，同佐山野花 （Nohana Sayama）合租工作室係一個既平凡又混亂嘅體驗。我哋嘅真實畫室生活離不開過度依賴我們珍貴嘅咖啡機，望住電腦螢幕上嘅展覽投稿表發癲，同埋冇目的哋將我哋啲嘢搬嚟搬去。儘管，我偶爾會喺我眼前呢個癲婆身上見到外界眼中嗰位畫界新星嘅影子。 

佢由細到大都習慣搬嚟搬去，未來得及紮根，就要搬去另外一個國家。呢個「無常家」嘅狀態迫使佢同無數嘅空間、環境、好友分離，而佢嘅畫，某程度上係記錄自己存在過嘅時刻同空間。室內嘅每一個角落，都像見證住佢嘅生活。雖然畫裏冇人，但嗰啲空間有一種溫暖、一種微妙嘅「平凡」感，好似俾佢忙碌又漂泊嘅生活暫時停落。 

然而，私底下嘅時後，佢只係會講：「我鍾意啲顏色，構圖就係咁。実際簡単なんだよね。」

作為佢創作過程嘅主要見證者，我睇住佢用日本顏彩慢慢疊色、建立對比，每層都小心處理，帶出超越技巧嘅概念重量。每一筆，都係一句發自內心嘅無聲吶喊，強烈哋重複住：記住我。記住我。我一定要記住。 

同野花一齊喺studio就一定冇安靜日子過㗎喇。就好似佢啲畫咁，佢本身自帶恒常嘅能量hum。日常嘅對話中都會討論吓唔同畫畫嘅技巧，不過大多數時間都係講啲不宜重複嘅冇營養廢話。我都想我哋日日都好有紀律咁畫畫畫，但現實唔係咁。有啲日子，我哋會攤喺佢手作嘅character豆袋上，歎咖啡（或者茶）；我哋食嘅杯麵同朱古力分量夠供十幾個大學生。 

其他日子就比較...混亂。我哋一踏入工作室，就見到昨晚撐好嘅畫紙全部變形。彎晒，完全唔方正。我哋雙眼放空，呆坐喺凌亂嘅空間，失落咁諗：「我哋係咪所有畫都註定會變形？」我哋急住搵方法fix嗰個變咗形嘅角落，想用螺絲固定喺牆上——可惜野花所有天份都用喺畫畫度，揸螺絲批就……嗯。 

然而，當藝進拍訪問時，我再次見識到 藝術家佐山野花。鏡頭前嘅佢自信、有份量，同平時傻笑嘅“Nona”形成強烈對比。佢簡單直接地講解自己嘅創作背景：「我主題係嘗試記住自己當刻喺邊，透過過去自身存在過嘅地方，搵到歸屬感。」佢話，「我好似從來未有過一個叫做‘家’或者屬於自己嘅地方。」 

工作室既係工作地，又係一個安樂窩。「呢度就係我嘅工作空間。」佢指住稍微凌亂嘅桌面，日本顏彩整齊哋排列喺佢嘅palette上。意料之外（但又唔算出奇），佢最鍾意嘅位置就係我哋嘅零食吧，包括日益增多嘅 mug collection。「喺snack bar定beanbag角落（之間），我選擇困難。」 

呢個空間好cozy，每個佈置都充滿住野花嘅心思：手作beanbag、Year1 嗰時偷返嚟嘅凳、寄託住佢稍縱即逝嘅‘家’感嘅小擺設——擺放方式同佢畫作呼應。我而家先清楚意料到，第日到我哋離開呢個畫室嘅時候，呢個景象就會成為一幅構圖。 

望住佢講嘢，我見到嘅唔止係杯麵、變形畫框、同埋螺絲批。呢個就係笑聲、挫敗、同工作室生活嘅小奇蹟背後，一筆一筆咁喺無常入面雕刻永恆嘅藝術家--- 我嘅好朋友，佐山野花。

圖：Chihiro Shigemitsu, Gigi 文：Gigi