藝進闖畫展：《在英國，我們也曾偶爾濕重》

呢個展覽《在英國，我們也曾偶爾濕重》，由高午策劃，集合六位移居或者準備移居英國嘅香港藝術家同插畫師，一齊用作品去講移民生活入面嗰啲熟悉又難以言喻嘅情緒。

展覽由一個詞展開——『濕重』。

濕氣呢樣嘢，香港人最熟悉亦最抗拒：黏立、侷促，令人透唔過氣。即使身處清涼乾燥嘅倫敦，呢份熟口熟面嘅沉重，依然如影隨形，偶爾浮現，黏實唔走。

行入嚟呢個展覽空間，先由Rick LO 鮮豔嘅art print 所吸引。介乎於回憶同幻想之間，每幅作品裏面都隱藏住一啲小細節俾觀眾細味。我哋最俾 《WhaleFall》 打動。鯨落聽落雖然淒美，但 Rick 筆下嘅鯨魚背上載住「珍寶海鮮坊」，呢個畫面充滿住生命力，彷彿喺到講：雖然鯨魚同餐館唔喺度，但一直活喺我哋記憶入面。鯨魚鰭上隱藏嘅香港地圖，都係移英港人共同嘅回憶。

轉身就係林皮嘅畫作。今次林皮展出嘅畫作同佢以往插畫創作見得出一個微妙突破，由左至右可以見到佢嘅畫中嘅主要題材由人物演變成植物、花草。呢個係喺佢移居到英國後，通過觀察佢身邊嘅環境，而逐漸發展出嚟嘅轉變。佢開始關注自然界嘅細節，從而將植物同花草作為承載情感同記憶嘅新載體。特別喺 “Why Me?” ，係喺佢咁多幅作品裏面唯一一個使用text嘅Composition。通過同藝術家嘅訪問得知，原來呢幅畫係取題於佢係公園親身目睹嘅情境：有一個小朋友因為唔鍾意佢食緊嘅雪糕，所以大聲扭計，大叫 ”Why Me?”，瞬間打破咗公園原有嘅安寧。林皮將小朋友化身為一朵花，但仔細睇，朵花嘅形狀又令人聯想起一個 “都都嘴”，喺童真與幽默之間製造咗微妙嘅張力。

接下來就有Sandy Leong嘅作品。佢嘅作品分為兩部分，第一部分係 Grandma's Magic House， 延伸自佢早前同日本作家合作過嘅繪本，Grandma’s Milky Tea。Sandy 嘅作品靈感來自佢同佢嘅外婆嘅回憶，主題係探討生死、離別嘅議題，特別針對小朋友觀眾，因為對於移民過嚟嘅小朋友，好多都難免遠距離經歷呢啲人生嘅必經課題。第二件作品由動畫嘅形式展出，作品《Love in a Fallen City》 則係一個結合現場繪畫與動畫嘅表演項目，由 Sandy 聯同倫敦交響樂團成員共同創作，屬於一個持續進行中的跨界合作計劃。

再行入第二間房就可以見到Gladys 嘅作品。佢嘅畫作以刻劃入微嘅香港城市景觀油畫為主。畫面入面很著重隨處可見嘅香港建築元素，例如欄杆同路燈，化為提示，邀請觀眾將畫面投射返自己嘅記憶之中，從而將風景轉化為屬於自己嘅回憶。細緻嘅筆觸喺畫面上營造咗嘅質感，見證住畫家係每幅畫背後傾注嘅時間，就好似透過每畫嘅一筆同觀眾一齊回味每個細節，每個角落。

轉過彎，大家而家係牆上見到充滿香港特色嘅作品係嚟自於插畫家Lotte siu 。相信大家都發現左貼係畫廊窗口嘅雀仔亦都係出自佢嘅妙手！

從紙皮石到紅白藍，Lotte 喺網上收集左移居者嘅經歷，受感動嘅佢開始用獨特嘅筆觸為呢啲記憶留下獨一無二嘅紀錄。今次展覽中，佢精選咗四個故事展出，作品名為《Lost and Found》。作品採用模組化方塊嘅形式，邀請觀眾親身參與、重新排列。呢個重組嘅過程，象徵移居過程中散落、斷裂嘅有形與無形記憶被重新拼湊與點燃——亦正正係 Lotte 希望帶領我哋重新找回嘅記憶狀態。

策展人 高午 嘅數碼藝術作品則以燈箱形式呈現。其中《傷心公園五號》帶有一種濕潤嘅氣氛，令人彷彿聞到雨後公園濕漉漉嘅氣味。雨後嘅公園，從細個開始就帶有一種「不可進入」嘅暗示——落雨嘅時候，細路往往唔可以出街去公園玩。呢種「inaccessibility」，相信唔少移居英國嘅香港人，都會喺另一個層面上感受到。身體與童年回憶場景之間嘅距離，累積出一種更深層嘅隔閡感；而作品中，觀眾被水體分隔於公園之外，正正呼應咗呢種距離——字面上，被一片海洋同幾個大洲所阻隔。畫面背後嘅 Panasonic 招牌，亦喚起香港高樓林立嘅城市景觀，成為記憶中難以觸及嘅背景。

返到第一間房，可以見到一組小型混合媒介作品《沒有人是一個島》。系列中，一幅色彩鮮明，一幅色調內斂，呈現出能量與寧靜之間嘅對照。個人特別鍾意右邊嘅《沒有人是一個島・四號》，構圖上運用框景效果同留白，帶嚟一種呼吸感；再配合金屬細節，令畫面層次同質感更加突出。

最後，返到嚟Gladys嘅 lonestanding 作品 Humidity 96%。個人認為，呢幅畫完美呈現到今次展覽「濕重」嘅感覺。畫入面嘅景象俾一層濕霧濃濃罩住，少少翳焗之餘，熟悉嘅景象又好似滋潤到我身處英國對香港景色嘅牽掛之情。

希望大家都可以喺作品入面搵到共鳴。《在英國，我們也曾偶然濕重》展覽喺8 月 31 號 已經圓滿結束。請大家多多支持呢六位藝術家嘅未來動向！