藝進推介：三間倫敦必去美術用品店

1. Jackson's Art Dalston

   

   
   
   
   
   

   Jackson’s Art 一向以佢哋齊全又好用嘅網店聞名，佢哋stock 好多個國際品牌，無論係畫材、工具定紙張，幾乎乜都有齊，仲提供學生優惠，正！位於 Dalston 嘅實體店同樣值得一去，可以一達地方買齊晒所有嘢。佢哋門市分兩層，地下成層都係畫面底材， 包括stretcher bar，畫布，畫板、等，尺寸非常齊全，對於臨 deadline 先開始拉畫布嘅創作者嚟講，幾乎係救命級別嘅存在。第二層擺滿晒畫材同埋工具 -- 油畫、亞加力、版畫、粉彩-- 想要乜基本上都有。雖然門市冇網店咁多種類，但光是油彩就已經有8款，包括有齊 Jackson’s 自家品牌產品，性價比相當高。同時，佢哋更有好多Holbein嘅產品，仲有埋日本顏彩添！整體嚟講，Jackson’s Art 係一間好可靠嘅一站式實體店，無論係臨時補料，定係一次過買齊創作所需，都唔會失手。

2. AP Fitzpatrick Fine Art Materials

   
   
   

   

   
   
   

   位於Bethnal Green嘅 AP Fitzpatrick Fine Art Materials 簡直係專門顏料控嘅天堂。細細間舖，一入到去就見到右邊整齊排列晒嘅粉狀顏料牆，仲有碳酸鈣、大理石粉、蠟粒同動物膠等專業材料。舖頭貨品非常齊全，特別係 Kremer 嘅產品：粉末顏料、顏色膏、油畫同亞加力媒介、等等，幾乎可以一次過滿足你所有材料需要。此外，佢哋係 Lascaux 亞加力顏料嘅主要供應商，產品範圍涵蓋亞加力顏料、媒介同各種canvas size（用嚟令畫布繃緊、封布用嘅上膠材料）。店舖仲會按要求提供免費布料樣本，方便藝術家喺創作前測試效果。再加上佢哋仲有一系列專業修復材料，無論係專業修復師定實驗型藝術家都可以搵到心水用品。

   
   

3. Atlantis Art Materials

   
   
   

   

   

   

   Atlantis Art Materials 自稱係全英國最大型嘅藝術用品店之一。位於Bayford Street Industrial Centre嘅佢以warehouse形式經營。店內 stock 嘅繪畫同水彩紙尺寸選擇非常廣泛，包括市面上較少見嘅大尺寸紙張。其中一個特別受歡迎嘅賣點係，店內提供 多款材質、weave嘅畫布，更有一整個「特價」section 賣亞麻布嘅 off-cuts，價錢比起正價平均低一半，啱晒啲有尋寶精神嘅人嚟執下平嘢！佢哋亦有一整櫃stretcher bars，最長去到300cm，啱晒對作畫用底材好有要求嘅創作者。